Կանանց սխալների մասին

Հաճախ առաջին հանդիպման գնալիս կանայք հագնվում են, ինչպես շքերթի կամ հարսանիք գնալիս։ Եվ հաճախ մտածում են. Որպեսզի այս հանդիպումն առաջինն ու վերջինը չլինի, ես կներկայանամ իմ ամբողջ հմայքով, կհագնեմ ամենաշքեղ հագուստս ու կդատարկեմ ամենալավ օծանելիքիս սրվակը։ Շրջազգեստս էլ հնարավորինս կարճ պետք է լինի։ Նրանց այս չափազանց մեծ ցանկությունն էլ երբեմն դառնում է այլևս չհանդիպելու պատճառը։

Ինչպե՞ս մեզ դրսևորել առաջին հանդիպման ժամանակ, ինչպե՛ս խուսափել ամենատարածված սխալներից։ Ի՞նչ անել, որ տղամարդը երկրորդ հանդիպումն էլ նշանակի։ Եվ առհասարակ ամենից հաճախ ի՞նչ սխալներ են գործում կանայք առաջին հանդիպման ժամանակ։

ՍԽԱԼ 1.

Հաճախակի եք խոսում ձեր արժանիքների ու ձեր մասին։ Տղամարդիկ ավելի պարզ են, քան մենք, նրանք լավ գիտեն, որ լավ ապրանքը գովազդի կարիք չունի։ Չափից ավելի գովեստները կարող են հակակրանք առաջացնել տղամարդու մեջ։ Եվ մի մոռացեք, որ բոլոր տղամարդիկ բնությունից օժտված են առաջնորդի հատկություններով։ Նրանք սիրում են ուշադրության կենտրոնում լինել, սիրում են, երբ խոսակցուցությունը իրենց շուրջն է պտտվում, իսկ կանայք, որոնք զրույցի հենց սկզբից իրենց գովքն են անում, ձանձրացնում են տղամարդկանց։

ՍԽԱԼ 2.

Հաճախակի եք խոսում սեփական թերությունների մասին։ Չէ, ի՞նչ ես ասում, ես ամենևին էլ այդքան գեղեցիկ չեմ, պարզապես այսօր սանրվածքս է գեղեցիկ։ Այո, պատրաստվել եմ... Իրականում մազերով փակում եմ մեծ ականջներս... Ամեն անգամ կորցնում եմ փողս ու բնակարանիս բանալիներըե։ Իհարկե, անկեղծ ու ճիշտ խոսելը հոյակապ հատկություն է, բայց ոչ առաջին հանդիպման ժամանակ։ Ինքնանվաստացան ի՞նչ կարիք կա։ Ինչո՞ւ եք խանգարում տղամարդուն, որը ցանկանում է ձեր մեջ գեղեցկուհի տեսնել՛ արժանի սիրո և հիացմունքի։ Երբեք մի վիճարկեք ձեր հասցեին ասված հաճոյախոսությունները։ Յուրաքանչյուր հաճոյախոսության լավագույն պատասխանը քնքուշ ժպիտն է և մեղմ շնորհակալական ժեստը։

ՍԽԱԼ 3.

Շպարվելիս վառ գույն եք օգտագործում, մինչդեռ տղամարդիկ դա ընդունում են որպես կանանց հուսահատության արտահայտություն։ Խեղճ կին, ինչքա՛ն շատ է ուզում դուր գալ ինձ,– մտածում են նրանք ու անմիջապես տուն հրավիրում, չէ որ ձեզ պես պչրուհուն պետք է ինչ-որ բանով ուրախացնել։Եթե չեք կարողանում հաճելի ու չափավոր շպարվել,դիմեք ծանոթներից որևէ մեկի օգնությանը, որը շատ ավելի հմուտ է այդ գործում։ Համաձայնեք՛ առաջին տպավորության համար արժե ջանքեր թափել:

ՍԽԱԼ 4.

Խոսում եք ձեր խնդիրներից, դժգում կյանքից։ Մինչդեռ տղամարդիկ չեն հանդուրժում դժգոհ կանանց։ Կյանքում վերելքներն ու վայրէջքներն անխուսափելի են, իսկ մրցակիցները մշտապես պայքարում են մեր տեղը գրավելու համար։ Տունը տղամարդու համար ամենահանգիստ վայրը պետք է լինի։ Իսկ եթե վերադառնալով տան անդորրի փոխարեն գտնում է մի կնոջ, որն անդադար բողոքում է, թե ինչքան դժվար է ապրել, ժամանակի ընթացքում սկսում է աշխատանքից հետո տուն չշտապել։ Մեծ է պարտվելու հավանականությունը, եթե փորձում եք տղամարդու սիրտը գրավել ձեր հանդեպ խղճահարություն առաջացնելու միջոցով:

ՍԽԱԼ 5.

Հեքիաթ թանկարժեք իրերի մասին: Եթե անգամ մեծահարուստի հետ եք հանդիպում ու նախատեսում եք նրա շնորհիվ նոր Մազերատիի ղեկին նստել, մի քանի թանկարժեք մուշտակ ունենալ և այնքան երազած Փարիզի ուղեգիր ձեռք բերել, չարժե առաջին իսկ հանդիպման ժամանակ պատմել նրան ձեր ծրագրերի մասին: Տղամարդիկ հոտառությամբ որսում են կանանց մտադրություններն ու փախչում են դրանցից, ինչպես հրդեհից։ Նրանց համար, ինչպես և կանանց, շատ կարևոր է իմանալ, որ ձեզ ոչ թե իր դրամապանակն է հետաքրքրում, այլ ինքը՝ այնքան գեղեցիկ, այնքան առնական ու անկրկնելի։ Այսպիսի միջոցներով սեփական վարկը տղամարդու աչքին բարձրացնել ցանկացող կանայք հաճախ հակառակ արդյունքի են հասնում, նրա կինը դառնալու հավանակ-նությունն անմիջապես նվազում է։ Տղամարդիկ փնտրում են այն կանանց, որոնց կողքին լինելը մենակ ապրելուց ավելի լավ կլինի։ Խոսքը նաև նյութական ոլորտին է վերաբերում։ Եթե նա սկսի ձեզ ընկալել իբրև վամպիր, որի կյանքի նպատակը կողակցից ամբողջ վաստակածը յուրացնելն է, ապա կգերադասի ոչ թե գեղեցիկ կնոջ ընկերակցությունը, այլ միայնակ տղամարդու կյանքը։

ՍԽԱԼ 6.

Քննարկում եք ամուսնությունը։ Ապագայի ծրագրեր կազմելը հիանալի է, բայց ոչ առաջին հանդիպման ժամանակ, քանի դեռ չեք հասցրել նայել միմյանց աչքերի մեջ ու հասկանալ՝ արդյոք ձեզ նման կողակից պե՞տք է, թե" ոչ։ Ավելին՝ չպետք է պլանավորել, թե քանի երեխա եք ունենալու, ապրելու եք ամուսնու ծնողների հետ, թե ոչ, տանը շուն պահելու եք, թե ոչ։ Տղամարդիկ նման խոսակցություններն ընկալում են իբրև իրենց շատ արագ ցանցը գցելու փորձեր։ Վախենում են, մեկը մյուսի հետևից սկսում են վառել ծխախոտի գլանակներ կամ, որ ավելի սարսափելի է, փախչում են՝ առանց հրաժեշտ տալու։

ՍԽԱԼ 7.

Նրան պատմում եք ձեր անցած սիրավեպերի մասին։ «Իմ առաջին սիրած տղամարդը՝ Կարենը, եղունգներն էր կրծում, ոչ մի կերպ չէի կարողանում նրան հետ պահել այդ վատ սովորությունից։ Իսկ այ երրորդը՝ Վահեն, շատ ուշադիր էր եղունգների, հագուստի նկատմամբ...։ Պարտադի՛ր է, որ տղամարդն իմանա ձեր նախկին սիրային կյանքի մասին։ Ուզում եք, որ համեմատվի՞։ Հավատացեք՝ նա այդ բանը չի անի։ Այդպիսով ընդամենը շատ արագ կհուշեք նրան, որ իրեն հանդիպած հերթական խելոք կինն եք, որը չի կարողացել լեզու գտնել ոչ մի տղամարդու հետ ու հիմա էլ իր կյանքն է ցանկանում խորտակել։ Իսկ որ ավելի սարսափելի է, հայ տղամարդկանց մեծ մասը չի կարողանում համակերպվել այն մտքի հետ, որ ինքը տվյալ կնոջ կյանքում առաջինը չէ։ Հիշեք՝ կինը պետք է հանելուկ լինի։

ՍԽԱԼ 8.

Ձեզ անդաստիարակի պես եք պահում։ Ձեզ ուշադրություն դարձրած տղամարդու հետ փորձեք խոսել նույն լեզվով։ Հավատացեք՜ ուժեղ սեռի ներկայացուցիչները սիրում ու գնահատում են դա։ Ինչպես և սիրում ու գնահատում են կանացիությունը մանրուքներում, օրինակ՝ նրանց դուր է գալիս կանացի գեղեցիկ քայլվածքը, ոչ թե զինվորական քայլքը, մեղմ ժպիտը, ոչ թե ձիու խրխինջը։ Ու սա միայն առաջին օրվան չի վերաբերում, խոսքն ընդհանրապես կանացիության մասին է, ամբողջ կյանքում։ Որոշ կանայք այդ արդյունքին չեն կարողանում հասնել ամբողջ կյանքի ընթացքում։ Բայց կարելի է ձգտել՝ դառնալու տղամարդու երագած կինը։

ՍԽԱԼ 9.

Հանդիպման վերջում առաջարկում եք կրկին հանդիպել։ Որքան էլ ջանքեր գործադրես, տղամարդը միշտ ուզում է հաղթողի կարգավիճակում լինել։ Եթե նա բարձունքը գրավում է առանց ճակատամարտի, շատ արագ էլ կորցնում է հետաքրքրությունն ու սկսում է նորը փնտրել։ Հիշեք՝ կինը միշտ պետք է կարողանա անհասանելի լինել։

ՍԽԱԼ 10.

Առաջին իսկ հանդիպմանը համաձայնում եք սեքսով զբաղվել։ Հանդիպումները տարբեր են։ Պատահում է՝ կինն ու տղամարդն այնպես են ձգում իրար, որ խուսափելն անհնարին է։ Բանը թեթևամտությունը չէ, այլ բնազդը, որը երբեմն չի հարցնում ո՛չ սոցիալական կարգավիճակ, ո՛չ առաջին հանդիպում, ո՛չ դաստիարակություն ու ինքնատիրապետում։ Նման դեպքերում խորհուրդ տալը պարզապես անմտություն է։ Մնացած բոլոր դեպքերում պետք է ոսկե կանոնի պես հիշել, որ իսկական արքայադստերը պետք է նվաճել։ Պահպանեք բոլոր անհրաժեշտ կանոններն ու օրենքները, քանի դեռ օրինական ոչինչ չկա ձեր միջև։ Երբեմն այդ կարգավիճակը շատ ավելի քաղցր է լինում, քան ինքը՝ սեքսը, ավելի քաղցր են հաճոյախոսությունները, հայացքները, ցանկությունը, ակնարկները... Ով ծանոթ չէ այս ամենին, չգիտի, թե ինչ բան է սիրո քաղցրությունը։

ՍԽԱԼ 11

Ասում եք՜ ես սեքսով չեմ զբաղվում առաջին հանդիպման ժամանակ։ Հավանաբար ձեր տղամարդն արդեն հարյուրերորդ անգամ է լսում այդ նախադասությունը ու հիմա էլ, այն լսելով ձեր շուրթերից, կարող է մտածել. «Հասկանալի է, հերթական դատարկ կինը, որ ուզում է բարձրացնել իր գինը։ Ինչպես արդեն նշեցինք, տղամարդիկ գնահատում են անհասանելիությունը։ Իսկ երբ ստիպում եք հասկանալ, որ իրականում այնքան էլ անհասանելի չեք, գոնե երկրորդ հանդիպման ժամանակ արդեն պատրաստ եք անկողին մտնել այդ տղամարդու հետ, անմիջապես սառեցնում եք ձեր նկատմամաբ եղած հետաքրքրությունը։ Այդ իսկ պատճառով շատ ավելի ցանկալի է պարզապես հաճելի ժպտալ ձեր երկրպագուին ու շնորհակալություն հայտնել միասին անցկացրած գեղեցիկ երեկոյի համար։ Եթե մանավանդ երեկոն իսկապես գեղեցիկ էր, ու արժե շնորհակալություն հայտնել։

Ձեզ բարի հանդիպումներ ու գեղեցիկ սեր եմ մաղթում։

Հարցեր, պատասխաններ, մեկնաբանություններ